تاند:( یکشنبه، د حمل ۲۸ مه) د احمد مسعود په مشرۍ د طالبانو خلاف د پنجشېر د مقاومت ډلې د افغانستان پر خاورې د پاکستان د هوايي او ځمکنيو بريدونو پر وړاندې توند غبرګون وښود.
دغې ډلې په یوه اعلامیه کې ویلي، چې دوی طالبان د دغه تېري او په هېواد کې د نورو بهرنيو لاسوهنو اصلي عامل ګڼي او په ټغر ټولیدو یې ټینګار کوي.
مقاومت ډلې طالبانو ته د «بهرنۍ نیابتي ډلې» اصطلاح کارولې او د پاکستان د بریدونو له زیانمنو سره یې غمرازي شريکه کړې ده.
د افغانستان يو شمېر نورو سياسي څېرو او لوریو هم د پاکستان هوايي او ځمکنيو بريدونو ته ورته غبرګونونه ښودلي دي.
پاکستان اوړمه شپه د خوست او کونړ ولايتونو پر ځینو برخو هوايي بمبارۍ وکړې، چې په خوست کې یې لسګونه وزيرستاني کډوال او په کونړ کې د ماشومانو په ګډون د يوې کورنۍ پینځه غړي ووژل.
خلکو د دې بریدونو پر وړاندې د طالبانو په دریځ توندې نیوکې کړي او ويلي، چې د پاکستان د يوې نفوذي ډلې په رول کې څرګندېږي او د يوه حکومت د مدعي په توګه یې د افغانستان استازيتوب نه دی کړی.