تاند- د امریکا د مریلنډ پوهنتون روغتون اعلان وکړ، د دیویډ بنت په نوم ۵۷ کلن سړی، چې دوې میاشتې پخوا ورته د خوګ یا خنزیر زړه پیوند کړای شوی و، د سې شنبې په ورځ مړ شو.
ښاغلی بنت، چې د جنورۍ په ۷ مه د خوګ زړه ورته پیوند شوی و، لومړنی انسان و چې د یوه خوک زړه له جنیټیکي اصلاح وروسته ورته پیوند شوی و.
د مریلنډ پوهنتون روغتون په یوه خبرپاڼه کې ویلي چې د ښاغلي بنت حال له څو ورځو مخ په خرابېدو و او د طبي کارکوونکو له ځانګړې پاملرنې سره سره څرګنده وه چې ژوندی نه پاتې کېږي.
ډاکتران وايي چې دا سړی له مخکې هم ناروغ و او د زړه د پیوند لپاره په شرایطو برابر نه و. د اکتوبر په میاشت کې ډاکترانو د ده د ژوندي پاتې کېدو یوازینۍ او وروستنۍ حللار دا وګڼله چې د خوک زړه دې ورته پیوند شي.
مخکې تر دې چې د پیوند لپاره د بنت جراحي عملیات پیل شي، کابو درې میاشتې د زړه او سږو له بای پاس ماشین سره وصل و.
خو له دې سره سره د ده بدن ته د خوک د زړه پیوند لومړنۍ بریالۍ تجربه وه.
د مریلند پوهنتون د روغتون ډاکتران وايي چې ښاغلی بنت د خوک د زړه د پیوند له خطرونو خبر و او له جراحي عملیاتو وروسته په لومړیو اوونیو کې د ناروغ وضعیت ډېر ښه و.
تر دې وړاندې هم انسان ته د خوک د بدن د غړیو پیوند نتیجه نه ده ورکړې ځکه چې د دواړو په جنیټیک کې توپیر شته او دا د دې سبب کېږي چې بدن نوی غړی ونه مني او یا د وایرس له کبله عفونت پکې پیدا شي.