تاند:(پنجشنبه، د حوت ۱۹ مه) د طالبانو د اوبو او انرژۍ وزارت چارواکو د غزني د سردې بند پروژې د چارو د پیل کېدو خبر ورکړ.
په دې اړه د کابل د سیندیزې حوزې عمومي رئیس پرون د سردې بند لیدو ته لاړ او دغه پروژه یې د هېواد په کچه یوه مهمه پروژه وبلله.
د کابل د سیندیزې حوزي عمومي رئیس ویلي چې غزني ولایت ته یې د سفر موخه د سردې بند کتل او د یاد بند د کرکیلې د ماشینري کواو ارزونه وه.
ده وویل چې ډېر ژر به د یوه تخنیکي ټیم په مرسته د ۷۵ زره جریبه ځمکې په اړه څېړنه وکړي چې د تېرو حکومتونو پر مهال غاصبانو د خپل ملکیت برخه ګرځولې.
دا په داسې حال کې ده چې په ۱۳۶۴ کال کې د یادې پروژې تشکیل ۳۴۰۰ کسانو ته رسیده؛ خو اوس یې د کارکوونکو شمېر ۳۰ ته راکم شوی او وسایل یې هم ویجاړ شوي دي.
د سردې بند د ظاهر شاه د واکمنۍ په وخت کې جوړ شوی دی. دغه بند د غزني د اندړو ولسوالۍ په ختیځ کې موقعیت لري او د دوه سوه نهه پنځوس میلیون مترمکعبه اوبو د زېرمه کولو وړتیا لري چې ۷۵ زره ځمکه خړوبولای شي.
د طالبانو چارواکو ویلي چې د اوبو مدیریت یې یو مهم کاري لومړيتوب دی.