تاند:(چار شنبه، د حوت ۱۸ مه) نن د کب اتلسمه د افغانستان د پرزول شوي جمهوري نظام د يوه پخواني لوړپوړي مقام او د شمال ټلوالې د مشهور مشر مارشال محمد قسیم فهیم د مړینې اتم تلین دی.
مارشال فهيم اته کاله مخکې د ناروغۍ له کبله ومړ، خو له مړينې وروسته يې د تلین ورځ هر کال په پراخو دولتي مراسمو نمانځل کیده.
سږ کال د نوموړي د اتم تلین ورځ په لومړي ځل د طالبانو له واکمنیدو سره برابره شوې، خو په دې اړه د مراسمو او مصرفي مراسمو څرک نه ښکاري.
مارشال فهيم، چې په ۲۰۰۱ کې د طالبانو د واکمنۍ په نسکورېدو کې يې د امريکا په مشرۍ له نړيوال ايتلاف سره د شمال ټلوالې د جنګياليو مشري کوله، د طالبانو له پرزېدو وروسته د شمال ټلوالې تر ټولو جګپوړی او مطرح چارواکی و.
هغه څه موده د افغانستان د دفاع وزیر او اوږده موده د ولسمشر کرزي لومړی مرستیال و.
د مارشال فهيم زوی محمد اديب فهيم پر افغانستان د طالبانو د بیا واکمنیدو په لومړیو ورځو کې په کابل کې و او د ډاکټر عبدالله په ملتيا يې له یو شمېر طالب مشرانو سره لیدلي وو.
د طالبانو د پلویانو تر څنګ د دوی ځینې منتقدان هم د دې ډلې د بیا واکمنیدو یوه مهمه لاسته راوړنه د پخوانيو جنګ سالارانو څنډې ته کول او د ملت په بودجې ید هغوی د ژوند او مرګ د تحمیلي درناوي پای ته رسول ښيي.
د يادونې وړ ده چې سږکال د احمدشاه مسعود، عبدالعلي مزاري او نن د مارشال فهيم د تلین ورځې د تېرو کلونو خلاف خلکو ته له مزاحمتي یادغونډو او مراسمو پرته ترسره کیږي.
څه موده مخکې تاند د طالبانو له لوري د نوې کال د جنترۍ په اړه د جوړ شوي پلان جزییات خپاره کړل، چې له مخې یې طالبان د احمدشاه مسعود او عبدالعلي مزاري د تلین ورځو رخصتي نه غواړي لغوه کړي.
په دې اړه د خلکو غبرګونونه منفي وو او له طالبانو غوښتل شوي وو، چې پر خلکو تپل شويو څېرو ته مشروعيت ورنه کړي.