تاند: ( جمعه، د کب شپږمه) د طالبانو ځايي چارواکو ويلي، چې په کندوز کې ېې د واکسیناتورانو د پروني وژنې په تور ۲ تنه نیولي دي.
باختر اژانس د کندوز د ځايي چارواکو په حواله ويلي، چې دغه کسان د کندوز ولايت په مرکز او امام صاحب ولسوالۍ کې د څلورو ښځو په ګډون د ۷ واکسیناتورانو د وژلو په تور نیول شوي.
سرچينې د نیول شویو کسانو د هويت او نورو جزيياتو په اړه څه نه دي ويلي.
د کندوز تر څنګ پرون په تخار ولایت کې هم یو واکسیناتور په ډزو وژل شوی او بل ټپي شوی و.
ملګرو ملتونو دا پېښې غندلي او د عاملينو د نيولو غوښتنه ېې کړی ده.