تاند: ( جمعه ، د دلوې دوه ويشتمه) د طالبانو د حکومت د چارو ادارې ويلي، چې د طالبانو کابینې د والیانو له لوري د ولایتي رئیسانو د نه ګوښه کیدو په اړه پریکړه کړې ده.
سرچینه زیاتوي، چې واليان حق نه لري، چې ولایتي رئیسان له خپلو دندو څخه ګوښه کړي.
ويل شوي، چې په دې اړه د طالبانو والیانو ته مکتوبونه استول شوي، چې له موجه دلايلو پرته خپل ولایتي رئیسان له دندو نه شي ګوښه کولای.
ويل شوي، چې په تازه پریکړه کې د ولايتي رئيسانو د ټاکلو لپاره د والیانو موافقه حتمي نه ده ګرځول شوې.
دا پریکړه په داسې مهال شوې، چې په وروستيو کې له یو شمېر ولایتونو څخه د والیانو او ولايتي رييسانو د اختلافاتو خبرونه ورکړل شوي وو.