تاند: ( چار شنبه ، د دلوې شلمه)‏ د افغانستان د پرځول شوي جمهوري نظام د بهرنيو چارو د وزير محمد حنيف اتمر په غوښتنه ‏‏محمد ولي نعیمي په ملګرو ملتونو نړيوال سازمان کې د افغانستان د نمایندګۍ د سرپرست په توګه خپله دنده پيل کړه.

پر دغې دندې د نوموړي د ټاکل کیدو غوښتنه حنيف اتمر څو ورځې مخکې د يوه رسمي مکتوب په استولو سره د ملګرو ملتونو له سرمنشي څخه کړې وه.

ملګرو ملتونو په دغه نړیوال سازمان کې د افغانستان څوکۍ تراوسه هم د پرځول شوي جمهوري نظام مخکينيو دیپلوماتانو ته پريښې ده.

د ملګرو ملتونو عمومي اسمبلۍ د طالبانو د بیا ځلي واکمنۍ په لومړیو میاشتو کې، د دوی حکومت ته د افغانستان د استازيتوب د څوکۍ له ورکړې ډډه وکړه او پريکړه يې وکړه، چې د جمهوري نظام دیپلوماتان به خپلو دندو ته دوام ورکړي.

له دې پریکړې وروسته په ملګرو ملتونو کې د افغانستان سفير غلام محمد اسحاقزي له دندې استعفا وکړه.

د هغه له استعفا وروسته، د نوموړي يوه کارکوونکي نصير احمد فایق د افغانستان د نمایندګۍ سرپرستي کوله.

فایق په وروستيو کې له ملګرو ملتونو وغوښتل، چې د افغانستان د پرځول شوي جمهوري نظام د مفسدو چارواکو شتمنۍ کنګل او دوی محاکمې ته را کاږي.

نوموړي د نړيوال سرمنشي په نوم د حنیف اتمر استول شوی لیک د خپلو همدغو څرګندونو پر وړاندې غبرګون ګڼلی دی.