تاند: ( شنبه ، د دلوې نهمه) د پاکستان د ملي امنيت د سلاکار ډاکټر معيد يوسف په مشرۍ د دغه هېواد يو لوړپوړی پلاوی نن کابل ته راغلی.
په کابل کې د پاکستان سفير منصور احمد خان وايي، چې معید یوسف د یوه بین الوزارتي پلاوي په مشرۍ کابل ته راغلی او د طالبانو د بهرنيو چارو وزير مولوي امیر خان متقي په مشرۍ يې د طالبانو یو شمېر چارواکو سره ګډه غونډه کړې.
پاکستاني سفير ويلي، چې دغه پلاوی به مختلفې نورې غونډې هم ولري.
له افغانستان سره بشري مرستې او د اقتصادي همکاريو زياتوالی د ياد شوي سفر اصلي اجنډا ګڼل شوې ده.
طالب وياندويانو په دې اړه ډېر جزییات نه دي ورکړي.
ويل کيږي، چې معيد يوسف ارګ ته هم تللی او نورو طالب چارواکو سره یې لیدلي.
معيد يوسف تېره پنجشنبه وويل، چې طالبان ورسره پر ډیورنډ کرښه د کتارو لګولو توافق لري، خو له دې سره هم دوی له افغان خاورې پر خپل ضد د ګواښونو د ختمیدو تایید نه کوي.
طالبانو د ډېر کله په شان د پاکستاني چارواکو دغو څرګندونو ته کوم غبرګون نه دی ښودلی.