تاند:( سې شنبه، د جدي اته ویشتمه) د روسیې د بهرنیو چارو وزارت وياندې ماریا زاخارووا هغه راپورونه رد کړل، چې ګواکې هېواد یې په افغانستان کې د جګړې لپاره د طالبانو خلاف د پنجشېر مقاومت ډلې سره د وسلو مرسته کړې ده.
نوموړې په دې اړه شوې څرګندونې د هغو امريکايي کارپوهانو تبلیغات ګڼلي، چې په وينا يې له روسانو وېره لري.
روسیه د احمد مسعود له پلار قومندان مسعود څخه اوږده کلونه په افغانستان کې د جګړو لپاره ملاتړ کړی دی.
د پنجشېر مقاومت ډلې مخکې ویلي، چې له هر چا څخه د طالبانو خلاف د جګړې لپاره پوځي او نورو مرستو منلو ته چمتو دي.
څه موده وړاندې داسې راپورونه هم خپاره شول، چې د طالبانو خلاف د مقاومت دغې ډلې د امريکا له بلک واټر امنيتي کمپنۍ څخه هم د طالبانو خلاف جګړه کې د مرستې غوښتنه کړې ده.
طالبانو په دې اړه کوم غبرګون نه دی ښودلی، خو ویلي چې ټول هغه خلک به وځپي، چې د دوی پر وړاندې دريږي.