تاند:( دوشنبه، د جدي شلمه) د طالبانو د لیکو د تصفيې د کميسيون مشر مفتي لطيف الله حکيمي ويلي، چې تر اوسه یې د طالبانو له لیکو څخه څه باندې دوه نیم زره کسان د « نا اهلۍ او نا وړه استفادې» په تور له خپلو لیکو تصفيه کړي دي.
نوموړي دا هم ويلي، چې دا کار د خلکو د شکایتونو په اساس تر سره شوی دی.
حکيمي زیاتوي، چې په مختلفو ولايتونو کې یې د کميسيون ځايي دفترونه فعال کړي او خلکو ته اعلان شوی چې د طالبانو په لیکو کې د ناوړه خلکو د موجوديت او له دې موجوديت څخه د ناوړه استفادې په اړه خپل شکایتونه شریک کړي.
د طالبانو دغه مقام وايي، چې د دوی له نوم څخه یو شمېر مخکینيو چارواکو هم ناوړه استفاده کړې، چې په نښه شوي او له لیکو څخه تصفیه شوي دي.
مفتي حکيمي زياتوي، چې د لیکو د تصفيې په اړه جدي دي او د طالبانو د عمومي عفوې د فرمان د سرغړونکو په ګډون ټول هغه کسان به په نښه او له لیکو څخه د ويستو تر څنګ د ضرورت په اساس تر دې هم زيات مجازات کړي، چې د خلکو د ځورونې سبب شوي دي.
دا په داسې حال کې ده، چې د کابل پوهنتون د استاد فيض الله جلال د نیول کیدو په اړه د طالبانو د وياند ذبيح الله مجاهد له څرګندونو سره د دې ډلې په اړه نیوکې لا زياتې شوي.
مجاهد فيض الله جلال ته د يوه منسوب جعلي ټویټر اکاونټ په استناد نوموړی یو متعصب، تش په نوم استاد او دانشمند، د طالبانو د حکومت خلاف د خلکو پارونکی او د دوی مشرانو ته په سپکاوي تورن کړی.
د طالبانو یو شمېر منتقدینو ویلي، چې د طالبانو د يوه هوښیار مقام په توګه چې د دوی ویاند هغه هم په يوه رسمي مطبوعاتي اعلامیه کې په جعلي مدارکو د څارنوال او قاضي رول ادا کوي، له مطبوعاتي فضا وراخوا وسله په لاس جنګیالي به یې خلکو سره څه ډول چلند کوي؟