تاند: ( شنبه د جدي يوولسمه) د طالبانو د پاسپورټ عمومي رئیس عالم ګل حقاني مني ، چې د امنيتي ګواښونو له کبله په کابل کې د دغه رياست فعاليتونه په ټپه درېدلي دي.
نوموړي نن ويلي، چې د امنیتي تدابیرو تر بشپړېدو وروسته به ډېر ژر بېرته په کابل کې د پاسپورټ د وېش لړۍ پيل شي.
حقاني وايي، پنجشنبه ورځ چې د طالبانو جنګياليو ته د پاسپورټونو د وېش لپاره ځانګړې شوې وه، لغوه شوې او همداراز تر دې وروسته به د پاسپورټ اداره د پنجشنبې او جمعې په ورځو رخصت وي.
څو اونۍ مخکې په کابل کې د پاسپورټ ریاست مخې ته د یوې چاودنې خبر ورکړل شو، خو طالبانو وويل چې يو بريدګر يې له برید څخه مخکې په نښه کړی او وژلی و.
د کورنیو چارو د پخواني وزير مسعود اندرابي په ګډون د جمهوري نظام يو شمېر مخکينيو چارواکو پر طالبانو تور پورې کړی، چې خپلو جنګیالیو ته د پاسپورټونو د وېش په پلمه یې پنجشبې ورځ په دې خاطر عام خلک پاسپورټ ریاست ته له ورتلو منع کړي وو، چې د القاعدې په ګډون يې پاکستاني او نورو بهرنيو ترهګرو ته افغاني تذکرې او پاسپورټونه جوړول.
طالبانو بيا په دې اړه غبرګون نه دی ښودلی.