تاند: ( پنجشنبه ، د جدي نهمه) د هلمند ولایت مارجې ولسوالۍ کې د ټرافیکي پېښې له امله یو تن وژل شوی او یو بل تن ټپي شوی دی.
په هلمند کې د طالبانو د اطلاعاتو فرهنګ رییس حافظ راشد هلمندي ویلي، چې ترافيکي پېښه د مارجې ولسوالۍ اړوند د ډراب څلورلارې سیمه کې د مازدا ډوله موټر او موټر سایکل تر منځ د ټکر له کبله شوې، چې یو کس پکې وژل شوی او یو بل تن ټپي شوي.
حافظ راشد مني، چې پرون د هلمند په مرکز لښکرګاه کې د حکمت الله په نوم یوه ځوان ځان ونې پورې ځړولی او مړ شوی دی.
نوموړي زياته کړه، چې ياد شوی کس ذهني ناروغ هم و، خو د ځان وژنې بل لامل يې نه څرګند شوی.
يو شمير ځايي خلکو بيا د دې ځان وژنې دلیل اقتصادي فقر او لوږه ګڼلې ده.
څه موده وړاندې په هلمند ولايت کې یوه بل کس هم د اقتصادي ستونزو له کبله ځان وژلی و.
پرون په کندهار کې د ظاهر شاهي لېسې يو سپين ږيری ښوونکی خپله د ډېرې لوږې له کبله مړ شوی و.
له لوږې څخه د خلکو د طبيعي مرګ او ځان وژنو خبرونه په داسې مهال دي، چې څه موده مخکې د طالبانو د حقاني شبکې يوه مخکښ مشر انس حقاني وویل: له لوږې يې څوک مړ نه دی لیدلی، د روزي ذمه خدای تعالی کړې او انسان په واښو خوړلو هم ژوندی ساتي.
د طالبانو رييس الوزرا مولوي محمد حسن اخند بيا ويلي و، چې د روزۍ ژمنه طالبانو نه، بلکې خدای کړې او خلک دې خدای ته په بغارو شي.