تاند:( چار شنبه، د جدي اتمه) د بې پولې خبريالانو سازمان وايي، چې طالبانو پرون د ښځو د لاريون ۱۱ پوښښ ورکوونکي خبریالان د یوه ساعت لپاره بنديان او د لاریون په ترڅ کې اخیستل شوي یو شمېر عکسونه یې له منځه وړي.
د یاد شوي سازمان په یوه اعلامیه کې د طالبانو دا عمل غندل شوی او په پرله پسې ډول د بیان ازادۍ نقض ګڼل شوی.
دا په داسې حال کې ده، چې د افغانستان د خبریالانو مرکز په کابل کې د نورین په نوم د خصوصي ټلویزیون د مشر عارف نوري د بیرته خوشې کیدو خبر ورکړی.
عارف نوري له خپل کور څخه طالبانو بیولې او دوه ورځې بندي کړی و.
د نوموړي او ۱۱ نورو خبریالانو د بندي کيدو په اړه طالبانو رسنيو ته څه نه دي ويلي.
په افغانستان کې د طالبانو له واکمنیدو سره د بيان ازادۍ او رسنیزو فعالیتونو سخته صدمه لیدلې.
د ځینو نړیوالو رسنیزو ادارو په حواله د طالبانو د واکمنۍ په لومړیو څلورو میاشتو کې تر ۴۰ سلنې پورې افغان رسنۍ تړل شوي او سقوط شوي او دغه لړۍ د لا پراخیدو په حال کې ده.
طالبان بيا ټینګار کوي، چې د بیان ازادۍ ته د اسلامي شريعت په رڼا کې قایل دي.
د منتقدینو په خبره یې، طالبانو ته هر هغه عمل چې د دوی په خوښه برابر نه وي، د اسلامي شريعت خلاف ښکاري.
څه موده مخکې په هلمند کې یو ځوان انجینر طالبانو له سختو شکنجو وروسته په دې دليل وواژه، چې ولې یې ښوونکو ته د معاشونو په نه ورکولو طالبان نقد کړي وو.
د هغې پېښې له رامنځته کيدو څه باندې یوه میاشت کیږي، خو طالبانو یې د عاملينو د معلومولو او مجازاتو په اړه خپله ژمنه نه ده عملي کړې.