تاند:( سې شنبه، د قوس دېرشمه) طالبان وايي، چې د سرپرست حکومت د وزیرانو مشر يې ملا محمد حسن آخند له یتیمانو، فلج وهلو او معلولانو سره د مرستې امر کړی.
هغه د کابینې د تائيد په ملتيا ويلي، چې د شهیدانو او معلولانو وزارت دې له خپل پلان سره سم د شهیدانو کورنیو او نورو خلکو ته مرستې ووېشي.
د طالبانو د اعلامیې په اساس، په دې پریکړه کې راغلي چې هرې کورنۍ ته د هر یتیم پر سر ۲ زره افغانۍ، هر فلج ته ۱۵ زره افغانۍ او هر د دوو اندامونو معلول ته ۱۰ زره افغانۍ د کومک په توګه ورکړي.
د دې مرستې بوديجه او نور جزییات لا نه دي په ډاګه شوي.
د طالبانو د واکمنۍ څه باندې ۴ مياشتې کيږي، خو تر اوسه یې لسګونو زره رسمي مامورينو ته معاشونه نه دي ورکړي.
د پاکستان صدراعظم عمران خان د اسلامي هېوادونو د همکاريو سازمان په وروستۍ غونډه کې خبرداری ورکړ، چې د معاشونو په ورکړه کې د پاتې راتلو تر حده د طالبانو د حکومت اقتصادي ستونزې به د دوی حکومت د سقوط له ګواښ سره مخ کړي.
طالبانو په دې اړه د عمران خان څرګندونو او د معاشونو د څو مياشتيني ځنډ د لاملونو په اړه د دولتي کارکوونکو نیوکو ته ځواب نه دی ویلی.
امر کړی.
جمله چې خلاصېږي بهتره دا ده چې داسې ولیکل شي (امر کړی دی.) دا د (غله بانک وهلی/وهلی دی)، (سړي اودس کړی/کړی دی) په څېر دي. که جمله دوه برخې ولري او په کامه جلا کیږي بیا دغسې له (دی) پرته پروا نه کوي. مثلا: ملا حسن اخوند د مرستو د ورکولو امر کړی، او ویلي یې دي چې دا مرستې د ثواب لپاره دي. خو داسې چې جمله پرې خلاصیږي بیا باید (دی) ورسره راشي.