تاند:( جمعه ، د قوس شپږ ویشتمه) د افغانستان د نجات حرکت په نوم د یوه سیاسي جریان مشر ډاکټر عمر زاخېلوال په هېواد کې له امنيتي ګواښونو شکايت کړی.
نوموړي دا ضمني شکايت د دغه سياسي جريان پر يوه مشر غړي مولوي عبدالسلام عابد د هغې چاودنې په غبرګون کې کړی، چې نن د کابل په کارته پروان سيمه کې شوې وه.
عمر زاخيلوال د دغې چاودنې د غندنې ترڅنګ ويلي: چارواکي د مولوي صاحب او د نوموړي په څیر نورو ملي شخصیتونو امنیت ته چې تر ګواښ لاندې دي جدي عاجله پاملرنه وکړي.
د طالبانو د کورنيو چارو وزارت بيا له مشخص کولو پرته دا پېښه د د دښمنانو کار ګڼلی.
د دغه وزارت په يوه اعلاميه کې راغلي، چې په دغه چاودنه کې مولوي عبدالسلام عابد له خپلو درېيو ملګرو سره سرسري زخمي دی.
سرچينه وايي، چې امنيتي چارواکي د پيښې جدي پلټنه کوي او د امنيت اخلالونکي به د قانون منګولو ته سپاري.
مولوي عبدالسلام عابد د کابل ښار د مشهور جومات ( عبدالرحمن جومات) خطيب او مشهور ديني عالم دی.
د چاودنې مسوولیت تراوسه کومې ډلې پر غاړه نه دی اخیستی.
مولوي عبدالسلام عابد د ډاکټر عمر زاخېلوال په مشرۍ د افغانستان د نجات حرکت له مخکښو غړو څخه دی.
دغه سياسي حرکت له محدودو سیاسي ادرسونو څخه دی، چې د طالبانو له واکمنیدو وروسته د هغوی ملاتړ کوي او نيږدې اړيکې ورسره لري.
طالبانو د دغې چاودنې په اړه څه نه دي ويلي، خو ګومان کېږي چې د چاودنې مسوولیت به داعش ډله پر غاړه واخلي.
ويل کيږي، چې ياده ډله له مولوي عابد سره د مذهبي باورونو له اړخه هم ژور اختلافات لري.
زاخیلوال لا اوس هم ځان ناګاره اچوی. دی ښه پوهیږی چی دا څلویښت کلن جنګ ده د ملی شخصیتونو د له منځه وړلو په خاطر. وګوری له مجروخ نیولی، تر چنیزایی، … جنرال ساپی، تر حکیم تڼیوال، تر جبار قهرمان، تر پتیال، تر دواخان، بیا جنرال رازق، … ترمولوی ریحان…
او ته ولی اعلامیه صادروی ته خو ملی نه یی تا سره څوک څه کار لري؟
په ملی کسانو کی دجمبوری ځیره خواره ګډول چه پردی لاسپوڅی وو ستره ملی او اسلامی ګناه ده.