تاند- جنوبي کوریا ژر یوه سیاره پروژه پیلوي چې د مصنوعي ذهانت، څېره پېژندونکې ټکنالوژۍ او د زرګونو امنیتي کمرو په مرسته په کورونا اخته کسان ومومي.
د رویټرز خبري اژانس د راپور له مخې، دا پروژه به په پیل کې په بوچیون ښار کې عملي شي چې پلازمېنې سیول ته نژدې د جنوبي کوریا تر ټولو ګڼ نفوسه ښار دی.
په دې پروژه کې، چې په راروانه جنورۍ میاشت کې پیلېږي، د څه باندې ۱۰ زره ۸۴۰ امنیتي کمرو، چې په ښار کې نصب دي، تصویرونه تحلیل کېږي او ورڅخه په کورونا اخته کسان پېژندل کېږي.
که څه هم ډېر کسان دا په خپل خصوصي ژوند کې مداخله ګڼي خو د کورونا له درکه پېښو شویو ستونزو دولتونه مجبوره کړي چې پر یو شمېر هغو قوانینو او قواعدو، چې په خپله یې جوړ کړي، سترګې پټې کړي.