تاند:( جمعه ، د قوس نولسمه) د پاکستان صدراعظم عمران خان د دې هېواد د مطالعاتو په یوه مرکز کې د افغانستان د بشري ناورین په اړه بیا اندیښنه ښودلې او د عاجلو مرستو یې ورسره کړې ده.
نوموړي اندیښنه ښودلې، چې د افغانستان بشري ناورین به پاکستان هم اغېزمن کړي.
هغه په دې اړه نور جزییات نه دي ورکړي، خو ویل کیږي چې پاکستان دغه هېواد ته د افغان کډوالو د سېلاب د ور ماتیدو او دغه راز د نورو افراطي ډلو له پياوړتیا سره دوی ته له خطر جوړیدو اندیښنه لري.
عمران خان ټینګار کړی، چې هېواد به یې په افغانستان کې د سولې له تامینیدو سره هر اړخیزې مرستې وکړي.
له دې خبرې هم نوموړي خپله موخه نه ده څرګنده کړې.
پاکستاني صدراعظم مخکې د تاجیکستان د ولسمشر امام علي رحمان په ملتیا د طالبانو او د دوی خلاف د پنجشېر د مقاومت ډلې ترمنځ د سولې خبرو د منځګړتوب تیاری ښودلی و، خو طالبانو او د پنجشېر مقاومت ډلې دواړو دغو خبرو ته لېوالتیا ونه ښوده.
دا په داسې حال کې ده، چې د پاکستان مالیې وزارت له افغانستان سره د مرستو د ټولولو لپاره د یوه صندوق د پرانیستلو خبر هم ورکړی.
په ټولنیزو رسنیو کې یو شمېر افغانانو په دې اړه توند غبرګون ښودلی او ویلي، چې پاکستان د شوروي خلاف د افغان جګړې د وخت په شان اوس یو ځل بیا د افغانانو په نوم نړیوالې مرستې غواړي ترلاسه او خپل شړیدلی اقتصاد پرې ورغوي.
د افغانستان په استازیتوب په نړیواله کچه د پاکستان پرله پسې را څرګندیدل هم د افغانانو له سختو مخالفتونو سره مخ شوی او ان پخواني ولسمشر حامد کرزي له دغه هېواده غوښتي، چې ځانته دې د افغانانو د استازیتوب حق نه ورکوي