تاند- سویډنۍ لیکواله سیلمه لاګیرلوف لومړنۍ ښځه ده چې له نن څخه یې ۱۱۲ کاله پخوا د ۱۹۰۹ کال د نوومبر په ۱۰ مه د نوبل د ادبیاتو جایزه وګټله.
دا چې د ۱۸۵۸ م کال د نوومبر په ۲۰ مه د سویډن په مارباکه کې زېږېدلې، لومړنۍ ښځینه ناول لیکواله وه چې د نوبل جایزه یې وګټله.
دې په ۱۸۹۱ م کال خپل لومړنی ناول، چې (Gösta Berlings saga) نومېږي، په دوو ټوکونو کې ولیکه.
دې په ۱۸۹۴ م کال د خپلو لنډو کیسو ټولګه (Osynliga länkar) «نه لیدل کېدونې اړیکې» چاپ کړه.
سیلمه لاګیرلوف په ۱۸۹۵ م کال د ښوونکې په توګه دنده پرېښوده، ایټالیا ته لاړه او ځان یې لیکوالۍ ته وقف کړ.
دې په ۱۸۹۷ م کال په ایټالیا کې (Antikrists mirakler) چاپ کړ چې د سیسلې په اړه یو سوسیالیستي ناول و.