تاند:( چارشنبه ، د قوس اوولسمه)‏‏‏ د پاکستان د بهرنیو چارو وزیر شاه محمود قریشي د ناټو مرکز بروکسل ته په سفر ورغلی او د ناټو سرمنشي ینس سټولټنبرګ سره یې لیدلي.

قریشي د دغې لیدنې پر مهال خبردرای ورکړی، چې د افغانستان بشري ناورین په چټکۍ سره مخ په پراخیدو دی او دوی ورته سخت اندیښمن دي.

د ده په وینا، که طالبانو سره تعامل ونه شي، وېره ده چې افغانستان نه به د کډوالو د وتو بحران هم پياوړی او دغه هېواد د ترهګرۍ د پټنځای ترڅنګ د نیشه یي توکیو د تولید په عمده مرکز بدل شي.

پاکستاني وزیر له نړیوالې ټولنې غوښتي، چې په عاجل ډول افغانستان ته د بشري مرستو په سمبالولو کې ګام واخلي.

هغه ادعا کړې، چې هېواد یې په افغانستان کې د سولې او ثبات ژمنو ته ژمن دی.

شاه محمود قریشي په دې برخه کې د اسلامي همکاریو د سازمان د غونډې کوربه توب ته اشاره کړې، چې د دسمبر په نولسمه به پاکستان کې د افغانستان د بشري ناورین په اړه جوړه شي.

پاکستاني رسنۍ وایي، چې د ناټو سرمنشي له قریشي څخه افغانستان ته د دوی د پاملرنې له کبله مننه کړې ده.

یو شمېر افغان سیاستوال او دیپلوماتان بیا وایي، چې د طالبانو له واکمنیدو سره افغانستان په نړیوال سټېج کې په شدت سره منزوي شوی او دا هغه لوی ارمان و، چې پاکستان له پخوا نه درلود.

د دوی په وینا، پاکستان ته له دغه وضعیت سره په نړیوال سټيج کې د مطرح کیدو ښه فرصت په لاس ور غلی او کولای شي د افغانستان د استازیتوب په پلمه ځانته لابي وکړي او نړیواله پاملرنه ور جلب شي.

د افغانستان پخواني ولسمشر حامد کرزي او یو شمېر نورو سیاستوالو له پاکستاني چارواکو غوښتي، چې د افغانستان د استازیتوب حق دې ځانته نه ورکوي.

پر طالبانو هم نیوکه ده، چې ولې یې د بهرني سیاست واګې تر ډېره پاکستانیانو سره دي.

طالبانو په دې اړه عامه نیوکو او افکارو ته کوم قانع کوونکی ځواب نه دی ویلی.