تاند:( پنجشنبه، د قوس يوولسمه) د طالبانو د لیکو د تصفيې د کميسيون مشر مفتي لطيف الله حکیمي وايي، چې خپلو لیکو کې د بهرنيو استخباراتي شبکو د نفوذي کسانو موجوديت نه شي ردولی.
نوموړي په يوه ټلويزيوني مرکه کې وويل، چې په افغانستان کې د تېرو شلو کلونو راهيسې مختلفو استخباراتي شبکو دلته حضور درلود او د دې امکان شته، چې دغو شبکو د دوی لیکو ته هم نفوذ کړی وي.
مفتي حکيمي، چې په عین حال کې د طالبانو د دفاع وزارت سرمفتش هم دی، ټينګار کوي چې د کميسيون فعاليتونه په جدي ډول روان او له بشپړو صلاحیتونو څخه برخمن دي.
سرچينه زياتوي، چې په ټولو ولايتونو کې یې دفترونه پرانيستي او د هغو کسانو د چاڼ او تصفیې لپاره به عاجل ګامونه واخيستل شي، چې د طالبانو په جامه کې د دوی د اصولو خلاف فعاليتونه کوي.
لطيف الله حکيمي په دې برخه کې د سلګونو هغو کسانو د تشخيص خبر ورکړ، چې د غلطیو له تشخيص وروسته د طالبانو له لیکو څخه تصفیه شوي دي.
نوموړې په ځانګړي ډول د هغو کسانو يادونه کوي، چې له داعش ډلې سره د تړاو موضوع پرې ثابتېږي.
دغه طالب مقام د یادو کسانو د محاکمې او مجازاتو خبر هم ورکړ، خو ویې نه ویل چې څومره کسان په دې تور نیول شوي دي؟
ځينې شنونکي بيا په دې باور دي، چې د خپلو لیکو د تصفيې لپاره د طالبانو اساسي دليل او وېره همدا ده، چې داعشیان يې په لیکو کې ځای پر ځای شوي او له خپله منځه یې د پاشلتيا لپاره اقدام کوي.
د افغانستان د ملي امنيت پخواني رئيس رحمت الله نبیل څه موده مخکې فارن پاليسۍ ته وويل، چې د طالبانو له منځه به د دوی ځينې ډلې زر د داعش بیرغ پورته او د دوی په خپلو وسلو او امکاناتو د دوی خلاف د جهاد ورکړل شوې فتوا عملي کړي.
طالبان بيا د داعش ډلې د قوت په اړه څرګندونې رسنيز تبلیغات ګڼي او ټينګار کوي، چې داعش پياوړی نه دی او دوی یې مزاحمتي هڅې کابو کولای شي.