تاند، دوشنبه، د ثور ۲۹مه: د سوداګرۍ او صنایعو خونه وايي، افغانستان به د کورونا بحران له کبله هند ته د وچې مېوې ځنډېدلي صادرات څو ورځو کې بیا پیل کړي.
د دغې خونې مرستیال یونس مومند تاند ته وايي، ټاکل شوې چې ۱۵۰ ټنه وچه میوه یو وار بیا د هوايي دهلېز له لارې هند ته واستول شي.
نوموړی وايي، په همدې کورونايي وضعیت کې يې تر دې وړاندې چین ته هم د ۱۱۰ ټنه جلغوزې یوه محموله د هوا له لارې استول شوېده: (( هڅه کوو چې نړۍ ته د افغانستان صادرات بیا پیل او عادي حالت ته راوګرځي.))
دا په داسې حال کې ده چې د کورونا د بحران له پیل وروسته ټولې نړۍ هر ډول راکړې ورکړې لپاره پولې سره وتړلې او هوايي دهلېزونه هم ورسره بند شول چې له کبله یې د افغانستان د بڼوالو او سوداګرو مېوې د خوسا کېدو له ګواښ سره مخ شوې.
همدا راز په ټول هېواد کې ۸۰ سلنه فابریکې هم وتړل شوې چې د ټول اقتصادي څرخ په درېدو افغانستان ته یو نیم میلیارد ډالره تاوان واوښت.