تاند:( چار شنبه، د عقرب شپږ ویشتمه ) ناروې له افغانستان سره ۲۳ میلیونه ډالره مرسته اعلان کړه ناروې په افغانستان کې د بشري ناورین د دوام په اړه له اندیښنې څرګندولو سره ویلي، چې له دغه هېواد سره به ۲۳ میلیونه امریکایي ډالره مرسته وکړي.
د ناروې د بهرنیو چارو وزیر آنیکن هویتفلد، له نورو هېوادونو هم غوښتي څو له افغانستان سره د بشري ناورین د مقابلې لپاره نقدي مرستې وکړي.
پرون، ملګرو ملتونو وويل، چې له هرو څلورو افغان ښځو او دوو ماشومانو څخه یو تن یې خوارځواکۍ ځپلی دی.
د دغه نړیوال سازمان د ارقامو په اساس، د افغانستان نېمایي خلک لا هم دې ته حیران دي، چې بل وخت ډوډۍ به له کومه کوي؟
یاد شوي سازمان مخکې ویلي و، چې په افغانستان کې د ټولو فقر ځپلو کچه ۲۴ میلیونه تنه ده او ۳ میلیونه ماشومان د خوارځواکۍ او شدید فقر له کبله د مرګ ګواښ سره مخ دي.
له تازه ارقامو سره ګومان کیږي، چې د خوارځواکۍ له کبله د مرګ ګواښ سره د مخامخو کسانو کچه نوره هم لوړه شوې ده.