تاند:( جمعه، د عقرب يوويشتمه) د القاعدې ډلې یوه مشرخالد بطرفي، په یوه ویډیويي پیغام کې طالبانو ته په افغانستان کې د بریالیتوب مبارکي وویله.
نوموړي ویلي، چې دا بریالیتوب يوازې د طالبانو نه، بلکې د ټول مسلمه امت برياليتوب دی.
د القاعدې ډلې دغه مشر د خدای تعالی شکر ادا کړی، چې طالبان يې واک ته رسولي.
نوموړي دعا کړې ده، چې طالبان په خپلو هڅو کې بریالي شي.
د طالبانو له واکمنیدو سره، د دې ډلې او القاعدې تر منځ د اړيکو د بيا پياوړي کيدو خبرونه زيات شوي دي.
طالبانو د دوحې تړون کې له امریکا متحده ایالاتو سره ژمنه کړې وه، چې د القاعدې په ګډون ټولو ترهګرو ډلو سره اړيکې پرې کوي.
خو ځينې خپاره شوي راپورونه ښيي، چې د طالبانو له واکمنیدو وروسته، د القاعدې ډلې یو شمېر مشهور غړي بیرته افغانستان ته را ګرځيدلي دي.
ويل کيږي، چې د کابل د نوي والي او حقاني شبکې د غړو په ګډون، د طالبانو يوه لويه برخه چارواکي له القاعدې سره ژورې اړيکې لري.
طالبانو په دې اړه راپورونه رد کړي دي.
امريکا انديښنه لري، چې القاعده ډله به د ۲ کلونو په موده کې د افغانستان له خاورې څخه د دغه هېواد خلاف بریدونه سمبال کړای شي.