تاند:( دوشنبه، د عقرب اوولسمه) د افغانستان لپاره د امريکا متحده ايالاتو د بهرنيو چارو وزارت نوی ځانګړی استازی ټام ويسټ په يوه رسمي سفر د ناټو سازمان مرکز بروکسل ته ځي.
د نوموړي د دغه سفر اعلان، د متحده ايالاتو د بهرنيو چارو وزير انتوني بلینکن کړی دی.
بلینکن پر خپل ټویټر لیکلي، چې نوی استازی به يې له نړیوالو متحدینو سره د افغانستان په اړه وغږیږي.
سرچينې په دې اړه نور جزییات نه دي ورکړي
د متحده ايالاتو مخکيني ځانګړي استازي زلمي خليلزاد، خپل مخکيني مرستيال او اوسني ځای ناستي ته په دنده کې د بریالیتوب هیله کړې ده.
دا سفر به داسې مهال کیږي، چې امريکا په افغانستان کې د داعش القاعدې ډلې د بيا فعاليدو په اړه جدي اندیښنه لري.
امريکا له دې کبله، بيا پر افغانستان د ممکنه برید خبرداری هم ورکړی، خو طالبانو یې انديښنې رد کړي او ټينګار لري، چې له افغان خاورې هیڅ هېواد ته ګواښ نه پېښېږي.
د امريکا مخکيني ولسمشر ډونالډ ټرمپ بيا، له افغانستان څخه د امریکايي ځواکونو وتل له تسليمۍ سره تشبيه کړې او ويلي، چې دا ډول وتل شرمونکي وو.