تاند (سې شنبه، د عقرب ۱۱ مه) د نیوزیلنډ حکومت په متحده عربي اماراتو کې خپل سفیر د افغانستان لپاره ځانګړی استازی وګوماره.
نیوزیلنډ په داسې حال کې د افغانستان لپاره ځانګړی استازی ټاکلی چې لا هم دا هیواد یو شمېر افغانان او نیوزیلنډیان له افغانستانه باسي.
د دغه هیواد د بهرنیو چارو وزارت ویندویې تایید کړه چې حکومت یې له افغانستانه په وروستیو اوونیو کې د ۵۷ تنو له ایستلو سره مرسته کړې ده. خو د اګست له پنځلسمې را په دې خوا یې د هوا له لارې ۳۹۳ تنه له افغانستانه ایستلي دي.
د ویاندې په وینا د نیوزیلنډ د بهرنیو چارو وزیرېNanaia Mahuta نانایا ماهوتل پرېکړه کړې چې په متحده عربي اماراتو کې خپل سفیر ماتیو هاوکینز د افغانستان لپاره د نیوزیلنډ ځانګړی استازی وګوماري او دا دنده د دې لپاره ورسپاري چې له افغانستانه د نیوزیلنډیانو او هغو افغانانو په ایستلو کې مرسته وکړي چې د نیوزیلنډ وېزې لري.
نیوزیلنډ تر دې پخوا د افغانستان لپاره ځانګړی استازی نه درلود.
د نیوزیلنډ حکومت تر ۱۲۰۰ ډېرو افغانانو ته، چې په افغانستان کې یې له نیوزیلنډي ځواکونو سره کار کړی او همداراز د هغوی د کورنیو غړیو ته وېزې ورکړي دي.
نیوزیلنډ په بامیان کې د ولایتي بیارغونې ټیم درلود او اکثره وېزې یې هم د دغه ولایت اوسېدونکو ته ورکړي دي.
د افغانستان لپاره د نیوزیلنډ ټاکل شوی استازی هاوکینز تېره اوونۍ په دوحه کې و چې له قطري چارواکو سره خبرې وکړي.
د قطر هوايي شرکت له نیوزیلنډ سره له افغانستانه د کسانو په ایستل کې مرسته کړې ده.
نیوزیلنډ په نړۍ کی یو بشردوسته او انسان خواخوږی هیواد دی چی همیشه يی د ملګرو ملتونو په چوګاټ کی د سولی او خبرو له لاری د نړیوالو ناورینونو د هوارولو هڅی کړی دی.
د افغانستان اوسنی ناورین چی عام بی وزله وګړی دلوږی او فقر له لا سه د ژوند او مرګ سره لاس او ګریوان دی د افغانستان لپاره د نیوزیلند د خاص استای ټاکل یوه ښه او په ځای پریکړه ده.
تالبان باید خپل تور جهالت یو خوا کیږدی او بی وزلو افغانانو ته د نړیوالو د بشری مرستو په رسولو کی هیڅ ډول خنډونه پیدا نه کړی. او بی وزله او ناداره افغانان د خپلو سیاسی لوبو ښکار نه کړی.