تاند:( دوشنبه، د ميزان پينځه ويشتمه) ايراني چارواکو ويلي، چې راتلونکې اونۍ به د افغانستان د سیاسي راتلونکې په اړه د یوه کنفرانس کوربه توب وکړي.
د ایران د بهرنیوچارو وزارت ویاند سعید خطیب زاده د جرمني ډي پي اې خبري اژانس ته ويلي،چې دا کنفرانس به د راتلونکې چارشنبې په ورځ ترسره شي.
ويل شوي، چې په دې کنفرانس کې به د افغانستان د ګاونډیو هېوادو د بهرنیوچارو وزیران او د روسیې استازی ګډون وکړي.
سرچينې ويلي، چې ایران به په دې غونډه کې په افغانستان کې د طالبانو او ټولو سیاسي ډلو په ګډون د یوه حکومت د جوړېدو غوښتنه وکړي.
د راروانې چارشنبې په ورځ به مسکو د طالبانو، متحدوایالاتو، پاکستان او چین د استازو په ګډون د یوې غونډې کوربه وي.
ايران په داسې مهال د افغانستان په اړه د دې غونډې د جوړولو اعلان وکړ، چې پرون یې ولسمشر محمد ابراهيم رئيسي د افغانستان لپاره خپل نوی استازی اعلان او په مناسبت یې جوړه شوې غونډه کې امريکا په افغانستان کې د داعش ډلې په ملاتړ تورن کړ.
د افغانستان په اړه له دې سیمه ییزو غونډو او د طالبانو د دویم ځلي واکمنۍ له دوه مياشتني کيدو سره، د دې ډلې حکومت تر اوسه هیڅ هېواد، حتا تر ټولو نيږدې ملاتړي یې پاکستان په رسميت نه دی پېژندلی.