تاند (چهارشنبه، د میزان ۲۱) ترکیه غواړي چې د مخدرو موادو په قاچاق او په منظمو جرمونو یو تورن افغان سنګر احمدي له خپلې خاورې وباسي.
د ترکیې د جمهوریت ورځپاڼې د راپور له مخې، احمدي په جرمني کې په لسګونو جرمونو تورن دی.
سنګري، چې د (لاینز کارټل) یا د زمریانو د جنایتکارې ډلې مشر دی، د جمعې په ورځ د ترکیې د پولیسو په یوه چاپه کې په استانبول ښار کې ونیول شو.
په دې چاپه کې، چې د استانبول د باچیلیولر مېنې په یوه هوټل کې وشوه، له سنګري سره ۴ تنه نور هم ونیول شول.
سنګري په ۲۰۱۷ م کال له جرمني څخه ایستل شوی و او د هغه د ځای ځایګي د موندلو په اړه په ټولنیزو رسنیو کې عکسونه خپاره شوي وو.
باور کېږي چې احمدي په جرمني کې په شاوخوا ۳۰ جنايي پېښو کې لاس لري.
د جمهوریت ورځپاڼې پر اساس، نوموړی او ورسره ۴ تنه نور نیول شوي کسان د استانبول ولایت د مهاجرت ریاست ته ولېږدول شول چې له ترکیې څخه وایستل شي.
ورځپاڼې نه دي لیکلي چې سنګري به کوم هیواد ته واستول شي.