تاند:( يکشنبه، د ميزان اتلسمه) په دوحه کې د طالبانو د اسلامي امارت او امریکا متحده ایالاتو ترمنځ د مذاکراتو بیا پيلیدو مختلف غبرګونونه رامنځته کړي.
له طالبانو سره د پرځول شوي جمهوري نظام د مذاکراتي پلاوي غړې حبیبه سرابي وایي، چې امریکا په دې خاطر له طالبانو سره دوحه کې بیا مذاکرات پيل کړي، څو د سیمه ییزو قدرتونو په لاس د هغوی د لوبولو مخنیوی وکړي.
د سرابي په خبره، امریکا متحده ایالات اندیښنه لري، چې طالبانو ته د دوی شا کول به چین او روسیه د امریکا د ګټو پرضد د طالبانو د استعمال زمینه مساعده کړي.
د افغانستان د ملي نهضت رئیس سید اسحاق ګیلاني بیا په قطر کې د متحده ایالاتو او طالبانو د پرونیو پیل شویو مذاکراتو پایلو ته خوشبین دی.
هغه په دې مذاکراتو کې له امریکایي لوري سره د افغان سولې لپاره د هغوی د ځانګړي استازي زلمي خلیلزاد نه موجودیت ته خوشاله دی او زیاتوي، چې هغه نه باید نور په داسې مذاکراتو کې نه وي؛ بلکې د ناکام او خاینانه ماموریت له کبله باید محاکمه هم شي.
د طالبانو او امریکا متحده ایالاتو ترمنځ پر ځینو موضوعاتو مذاکرات پرون پيل شول.
که څه هم ويل کيږي، چې پر افغانستان د طالبانو له واکمنیدو سره، د امريکا متحده ايالاتو د استخباراتي ادارې رئیس په يوه پټ سفر کابل ته راغلی او د طالبانو له یوه مشر ملا برادر سره يې ليدلي وو، خو د هغه سفر جزييات ډېر رسنيز شوي نه وو.
د طالبانو او امريکا په پرونیو خبرو کې د طالبانو د پلاوي مشري د طالبانو د بهرنيو چارو وزير امير خان متقي او د امریکايي پلاوي مشري د هغه هېواد د بهرنيو چارو وزارت مرستیاله مېرمن وندي شرمن کوي.
ويل کيږي، چې د دواړو لوريو د دوحې تړون عملي کېدل، په افغانستان کې ټول شموله نظام جوړيدل، په کابل کې د امريکا د سفارت بيا پرانيستل او ځينې نور موضوعات د بحث او خبرو عمده برخې دي.