تاند:( جمعه، د ميزان شپاړسمه) ‏د طالبانو د اسلامي امارت له منځه يوه باوري سرچينه چې نه غواړي نوم يې واخيستل شي، د طالبانو تر منځ د ملا برادر او حقاني ډلو تر منځ د اختلافاتو د دوام خبر ورکوي.

دغې سرچينې ويلي، چې د همدې اختلافاتو په اساس د طالبانو د رئيس الوزرا لپاره مولوي عبدالکبیر د سياسي مرستيال په توګه ټاکل شوی دی.

څو ورځې وړاندې تاند وېبپاڼې يو تحليلي راپور خپور کړ، چې د مولوي کبير ټاکنه پکې د ملا برادر د ګوښه کولو يا منزوي کولو هڅه ګڼل شوې وه.

طالبانو د مولوي کبير له تاکل کيدو څخه وروسته د ملا برادر موقف د رئيس الوزرا اقتصادي مرستيال ښودلی.

له دې سره، د ازبکستان د بهرنیو چارو وزیر عبدالعزيز کاملوف چې پرون کابل ته راغلی و، په ارګ کې يې د رئيس الوزرا له نوي ټاکل شوي سياسي مرستيال مولوي عبدالکبیر او بل مرستيال مولوي عبدالسلام حنفي سره، چې د هغه د مرستيالۍ ټایټل لا نه دی معلوم، لیدلي وو.

د يادونې وړ ده، چې د مولوي کبير له سیاسي مرستیال کیدو څخه مخکې د طالبانو د رهبرۍ په کچه سياسي موضوعات تر ډېره ملا برادر مخته وړل.

ملا برادر څو کاله وړاندې، همدا چې د پاکستان له بنده خوشې شو، د طالبانو د امیرالمؤمنین سياسي مرستيال او په قطر کې د دوی د سیاسي دفتر مشر وټاکل شو.

هغه له امریکا متحده ایالاتو سره د طالبانو د سولې خبرو مشري وکړه او له برياليتوب وروسته یې له امريکايي استازي زلمي خليلزاد سره دا تړون لاسليک کړ.

سرچينې وايي، چې د ملا برادر څنګ ته په ارګ کې د مولوي کبير ګومارنه په ډېر ګومان د حقاني ډلې په فشار شوې، څو برادر کمرنګه او کمزوری کړل شي.

د حقاني شبکې مشران د لوی پکتیا له ځدراڼو قوم څخه دي، په داسې حال کې چې مولوي کبير هم د همدغې سيمې او قوم اړوند کڼل کيږي.

طالبانو د دغو ادعا شویو اختلافاتو خبرونه مخکې رد کړي او بې بنسټه یې ګڼلي دي.

نيږدې مياشت وړاندې د ملا برادر او حقاني ډلې د مشرانو ترڅنګ په ارګ کې د وسله والې نښتې او دواړو خواوو ته د مرګ ژوبلې ادعاوې هم وې، چې طالبانو او خپله ملا برادر رد کړې.