تاند:( دوشنبه، د ميزان پینځمه) د قزاقستان د بهرنیو چارو وزارت ويلي، چې طالبانو سره اړیکې لرځ، خو په رسميت يې نه پېژني.
د دغه هېواد د بهرنيو چارو وزارت وياند د روسیې یوه خبري اژانس ته دا خبره په تازه مرکه کې کړې ده.
د ده په وينا، له طالبانو سره اړیکې يې هم په دې را څرخي، چې څنګه د افغانستان بحران ځپلو او وږو خلکو ته بشري مرستې ورسوي.
دا څرګندونې په داسې حال کې دي، چې د طالبانو د اسلامي امارت وياند ذبيح الله مجاهد د يو شمېر هېوادونو له لوري زر د دوی د رسميت پېژندلو خبر ورکړی و.
د قزاقستان سفير پرون د طالبانو د بهرنيو چارو وزارت له سرپرست امير خان متقي سره لیدلي وو.
د طالبانو د تر ټولو نيږدې ملګري او مدافع هېواد پاکستان په ګډون د نړۍ هیڅ یوه هېواد تر اوسه د دوی رژيم په رسميت نه دی پېژندلی.
د يادونې وړ ده، چې طالبان د اګسټ په پینځلسمه پر کابل حاکم شول.