تاند (دوشنبه، د میزان ۵) د ننګرهار امنیه قومندانۍ په جلال آباد ښار کې د بې پلېټه وسایطو پر ګرځېدو بندیز ولګوه.
د دې ولایت د رسنیو دفتر په یوه خبرپاڼه کې ویلي، چې په ښار کې د بې پلېټه، رېکشاو، موټرو او موټر سايکلو پر ګرځېدو بنديز پرېکړه یې د ښاري نظم لپاره کړې ده.
خبرپاڼه کې دغه راز ويل شوي، چې له دې پرېکړې سرغړوونکو سره به قانوني چلند وشي.
د سرچینې د پرېکړې له مخې دغه راز په ښار کې د شپې له لوري يواځې مسئولو امنيتي کسانو ته د فعاليت اجازه شوې نور هېڅ طالب سرتېری د ګرځېدو اجازه نه لري.
سرچینې دغه راز ویلې چې د افغانستان اسلامي امارت سرتېري دغه راز مکلف دي، چې د دندې پر مهال د مبايل له کارولو ډډه وکړي او زیاتوي چې باروړونکي موټرې هم ښار ته د ننوتلو اجازه نه لري.
دا پرېکړه وروسته له هغې کېږي، چې په دې ولایت کې په دې وروستیو کې بې نظمي د خلکو ژوند سخت تنګ کړی دی.
عام خلک هم د وروستیو پېښو یو لامل په ښار کې بې اسناده وسایط او بې نظمي یادوي.