تاند:(یکشنبه، د سنبلې ۲۸مه) د ناټو سازمان چارواکو په افغانستان کې د ترهګرو ډلو له بیا پياوړي کیدو اندیښنه ښودلې، خو ویلي چې سمدستي د دغو فعالیتونو د مهارولو لپاره د پوځي عملیاتو کوم پلان نه لري.
د ناټو سازمان د پوځي کمېټې مشر راب باور د یونان په پلازمېنه کې د ناټو د یوې مهمې غونډې پرمهال ویلي: د دغو عملیاتو د پلان نشتوالی په دې مانا نه ده، چې په راتلونکي کې به هم هلته د ترهګرو ډلو خلاف عملیات نه پلانیږي.
د ناټو نورو مشرانو هم مخکې له دې په دې اړه اندیښنې ښودلې او غوښتنه کړې وه، چې د افغانستان راتلونکي ګواښونه باید له پامه ونه غورځول شي.
په ورته وخت کې، د ناټو سرمنشي په افغانستان کې له امریکا متحده ایالاتو سره د شل کلن ګډ پوځي ماموریت د پایلو دفاع کړې او ویلي، چې په دې موده کې له افغانستان څخه د ناټو اومتحدینو خلاف یې هیڅ کوم جدي خطر نه و رامنځته شوی.
ده ټینګار کړی، چې بیا به هم د ګواښونو د شدت کچې ته په کتوسره، په دې تړاو لازمې پریکړې او ګامونه اخیستل کیږي.