تاند(پنجشنبه، د سنبلې ۲۵) وروسته له دې چې د امریکا د استخباراتي ادارې (سي آی اې چارواکو په افغانستان کې د القاعده شبکې د فعالیت په اړه څرګندونې وکړې، د متحدو ایالتونو د بهرنیو چارو وزیر انتوني بلینکن وویل، که القاعده شبکه له افغانستانه امریکا ته ګواښ پېښ کړ، مسوولیت به یې د طالبانو په غاړه وي.
بلینکن وویل، سره له دې چې طالبانو ژمنه کړې چې هیچا ته به اجازه ورنه کړي چې د امریکا په شمول د بل هیواد پر ضد د افغانستان له خاورې کار واخلي؛ خو امریکا به په دې خبرو اتکا ونه کړي.
د متحدو ایالتونو د دفاعي استخباراتي ادارې ريیس جنرال سکاټ ډي بیریر د سې شنبې په ورځ د ملي امنیت غونډې ته وویل «اوسنی محتاط اټکل ښايي دا وي چې القاعده شبکه له یوه تر دوو کلونو پورې د امریکا کورني امنیت ته خطر پېښولی شي.»
امریکايي چارواکي وايي چې په افغانستان کې د طالبانو له واکمنېدو راوروسته د القاعده شبکې غړي له اوسه د افغانستان په لور خوځېدلي او ممکن په راتلونکې کې په خطر بدل شي.
طالبانو ژمنه کړې چې القاعده، داعش او نورو ډلو ته به اجازه ورنه کړي چې د افغانستان له خاورې پر امریکا یا کوم بل هیواد برید وکړي. خو د افغانانو اندېښنه دا ده چې که القاعده یا بله ترهګره ډله په افغانستان کې حضور ولري او پلویان یې په امریکا یا بل هیواد کې برید وکړي، افغانستان د انتقام اخیستو لپاره تر ټولو اسانه هدف دی.
د امریکا استخباراتي چارواکي وايي، همدا اوس هم د القاعده او هم د اسلامي دولت د خراسان څانګه په افغانستان کې شته خو یوازې القاعده شبکه له طالبانو سره نژدې اړیکې لري او دا څرګنده نه ده چې طالبان به پر امریکا او نورو هیوادونو د القاعده شبکې د حملو د مخنیوي لپاره تر څه حده هڅه وکړي.
د سي آی اې مرستیال ريیس ډیویډ ایس کوهن وايي، د ده اداره افغانستان ته د القاعده شبکې د خوځېدو نښې ویني، خو د سي آی اې لپاره ګرانه ده چې په دې پوی شي چې کله به القاعده یا داعش دا وړتیا ترلاسه کوي چې پر امریکا حمله وکړي.
امريکا اوس په ورکړې سومبۍ پښيمانه ده، خو امريکا وه سي دوه کاله يې طالبانو ته غوړې ډوډۍ ورکولې.دوۍ وه سي د غني د حکومت لاس او پښې يې وروتړل. مګر غني هم هغه د شپون چل ورباندي وکړ وايي ته مي وزې وهه زه به د روزې وهم اشرف غني ددوۍ د منافق او وينو پلان او د افغانستان د ويشلو هيلي له خاورو سره خاورې کړې. امريکا په شرمو وشرميدله اوس بيا طالب د القاعده ملګری بولي.دغه چرګوړي ټول امريکا روزلي اوس په نړۍ کې داسي وشرميده سي نه څوک ورنه ډاريږي او نه يې څوک په خوله پياز خوري.