تاند(جمعه، د سنبلې ۱۹) د نړۍ تر ټولو ګڼ نفوسه اسلامي هیواد اندونیزیا له طالبانو وغوښتل چې د ښځو حقونو ته درناوی وکړي.
د اندونیزیا د بهرنیو چارووزیر رتنو مرسودي دا غوښتنه پرون / پنجشنبه/ په جاکارتا کې د استرالیا له دفاع وزیر سره له کتنې وروسته وکړه.
مرسودي زیاته کړه، اندونیزیا د افغانستان حالات په ځیر څاري او هیله لري چې دا هیواد به د سیمې او نړۍ د ثبات د ګواښلو لپاره د تروریستي ډلو له لوري د ترهګرو د روزنځای په توګه نه کارول کېږي.
د اندونیزیا د بهرنیو چارو وزیر دې ته په اشاره، چې د طالبانو له لوري په موقته کابینه کې، ښځو ته کومه چوکۍ په پام کې نه ده نیول شوې، له طالبانو وغوښتل چې د ښځو حقونه رعایت کړي.