تاند(چهارشنبه، د سنبلې ۱۷) روسیه وايي، تراوسه پورې لا په پام کې نه لري چې د افغانستان له نوي حکومت سره خبرې وکړي خو د دغه هیواد حالات به په ځیر څاري.
د کریملین ویندوی دیمیتري پیسکوف نن / چهارشنبه/ خبریالانو ته وویل «موږ په کابل کې د خپل سفارت له لارې تماس ته دوام ورکوو، ځکه چې دا زموږ د دیپلوماتانو د ساتنې د تضمین او د نورو تخنیکي مسلو د حل کولو لپاره ضروری دی. حاضردمه او تر دې دمه د نورو خبرو کوم پلان نه شته.»
پیسکوف همداراز وویل «روسیه به د نورو ډېرو هیوادونو په شان هغو ګامونو ته، چې نوی حکومت یې اخلي، په ځیر ګوري.»
د کریملین ویندوی په دې اړه څه ونه ویل چې ایا د طالبانو اقدامات به د هغو په اړه د روسیې پر دریځ اغېز ولري او که نه.
د ده په وینا، د روسیې لپاره ګواښ په افغانستان کې د تروریستي ډلو او د مخدرو موادو د قاچاقبرو له لوري پېښېدای شي.
په همدې حال کې د امریکا ولسمشر جو بایډن پرون وویل چې روسیه، پاکستان، چین او ایران غواړي چې له طالبانو سره جوړ راشي.