تاند(سې شنبه، د سنبلې۱۶) د پاکستان پوځ یو وار بیا د کونړ ولایت پر سرکاڼو ولسوالۍ د درنو وسلو بریدونه پیل کړي دي.
له دې سره په یو وخت د پاکستان پوځ له هغه اغزن سیم څخه، چې دوی په خپله نصب کړی، د کونړ لور ته رااوښتی او د افغانستان په خاوره کې په برقي ارو ځنګلونه وهي.
د سرکاڼو ولسوالۍ اوسیدونکي وايي، له تېرو څلورو ورځو راهیسې پاکستاني پوځیانو د دوی پر کورونو او کلیو د سپکو او درنو وسلو ډزې پیل کړي دي چې له کبله یې یو شمېر خلک ژوبل شوي او مالي تاوانونه وراوښتي دي.
د سرکاڼو د اوسېدونکو په وینا، د پاکستان له لوري په ډزو کې ۲ تنه ټپیان، لسګونه څاروي وژل شوي او او د خلکو کورونه زیانمن شوي دي.
پاکستان له ۲۰۱۰ م کال راهیسې ډیورند کرښې نژدې د کونړ پر ولسوالیو د درنو وسلو ډزې کوي چې له کبله یې په تېرو کلونو کې زرګونه کورنۍ د خپلو مېنو پرېښودو ته اړ شوې دي.
پاکستان ادعا لرله چې د افغانستان د ملي امنیت ریاست او د هند استخباراتي اداره د پاکستاني ضد عناصرو ملاتړ کوي.
د سرکاڼو اوسېدونکي وايي:«له درو شپو راهیسې په ګنجګل، سړوبۍ، مماڼو مينه او څپري باندې د توپونو ډزې کېږي.»
د سرکاڼو اوسېدونکي همداراز وايي چې پاکستاني ځواکونه له ازغرن سیمه راواوښتي او په کونړ ولایت کې په برقي ارو د ځنګل ونې پرې کوي.
پر کونړ واکمنو طالبانو تراوسه پورې د پاکستاني ځواکونو د حملو په اړه څه نه دي ویلي.