تاند(پنجشنبه، د سنبلې ۳) سي این این تلویزیون نن د باوري سرچینو په قول ویلي چې طالبانو د افغانستان پخوانی ولسمشر حامد کرزی او د ملي مصالحې د عالي شورا پخوانی ريیس عبدالله عبدالله په کور کې نظر بند کړي دي.

کرزی او عبدالله په یوه کور کې اوسي ځکه چې څو ورځې وړاندې طالبانو کرزی له خپله کوره ایستلی و. نوموړی اوس د ښاغلي عبدالله په کور کې اوسي.

سي این این وايي چې ښاغلیو کرزی او عبدالله له پرون / چهارشنبې څخه په کور کې نظر بند کړل شوي دي.

د سي این این پر اساس، طالبانو په داسې حال کې کرزی او عبدالله په کور کې نظربند کړي چې د روانې اوونۍ په پیل کې طالب سرچینو وویل چې کرزی، عبدالله او ملابرادر به په هغه ۱۲ کسیزه شورا کې شامل وي چې د افغانستان اصلي واک به یې په لاس کې وي.

طالبانو د کابل له نیولو وروسته د حکومت د جوړولو لور ته ورو ګامونه اخیستي دي. تراوسه پورې یې د کورنیو چارو، دفاع، او مالیې وزیران او تقریباً د ټولو ولایتونو لپاره والیان ټاکلي دي. خو لا هم څرګنده نه ده چې د حکومت مشر به حوک وي.