تاند(پنجشنبه، د سنبلې ۳) ترک چارواکي وايي، طالبانو له ترکیې غوښتي چې د اګست په ۳۱ له کابله د لوېدیځو ځواکونو له وتلو وروسته د حامد کرزي د نړیوال هوايي ډګر په اداره کې مرسته وکړي.
ترک چارواکو رویټرز خبري اژانس ته ویلي، دې ته په کتو چې ترکیه د روانې میاشتې تر پایه خپل ځواکونه له افغانستانه باسي، د کابل د نړیوال هوايي ډګر د خطرناک ماموریت په غاړه اخیستل به اسانه کار نه وي.
لا هم سلګونه ترک پوځیان د ناټو د غوڅ ملاتړ ماموریت په چوکاټ کې د کابل په نړیوال هوايي ډګر کې مېشت دي خو ترک چارواکو ویلي چې ټول ځواکونه په راتلونکو څو ورځو کې باسي.
د ترک پوځیانو لومړنۍ ډله نن د کابل له نړیوال هوايي ډګره خپل هیواد ته ستنه شوه.
د ترکیې د حکومت یوه چارواکي رویټرز خبري اژانس ته وویل«طالبانو د کابل د هوايي ډګر د ادارې لپاره زموږ څخه تخنیکي مرسته غوښتې ده.»
دغه ترک چارواکي، چې نه یې غوښتل نوم یې واخیستل شي، همداراز ویلي «له افغانستانه زموږ د ټولو ځواکونو له وتلو وروسته په داسې ماموریت کې ګډون موږ ته اسانه نه دی.»
ده دا هم ویلي چې د ترک ځواکونو له حضوره پرته د داسې ماموریت تضمین خطرناک کار دی.