تاند(سه شنبه، سنبلې ٢)- د اوکراین د بهرنیو چارو وزارت وايي، د دوى يوه الوتکه د کابل له هوايي ډګره ايران ته تښتول شوې ده.
د اوکراین د بهرنیو چارو وزارت وايي، دغه الوتکه د ناپېژاندو کسانو له لوري تېره اوونۍ ايران ته تښتول شوې ده.
اوکراین حکومت وویل، په پلان کې وه چې دغه له مسافرو ډکه الوتکه د دې هېواد هوايي ډګر پر لور روانه شي خو د ايران په لور تښتول شوې ده.
تراوسه پورې امریکا چې د کابل هوايي ډګر امنیتي چارې پرغاړه لري څه نه دي ویلي.
ايران هم تراوسه د اوکراين د دغې ادعا په اړه څه نه دي ویلي.
دارنګه دا هم نه دي ویل شوي چې په تښتول شوې الوتکه کې د کومو هېوادونو اتباع شامل دي.