تاند(دوشنبه، د سنبلې ۱) په داسې حال کې چې طالبان ټینګار کوي چې امریکا دې تر ټاکلې نېټې پورې له افغانستانه د خلکو د ایستلو عملیات بشپړ کړي، بریتانیا او جرمني د دې پروسې د بشپړېدو لپاره د وخت د اوږېدو غوښتنه کوي.
د جرمني د بهرنیو چارو وزیر هیکو ماس نن /دوشنبه وویل، د جرمني، امریکا، ترکیې او طالبانو ترمنځ خبرې روانې دي چې د کابل هوايي ډګر په څه ډول د خلکو د ایستلو لپاره فعال پاتې شي.
ښاغلي ماس وویل، د هوايي ډګر په خوله کې د نامعلومو وسله والو او لوېدیځو امنیتي ځواکونو ترمنځ له نښتې وروسته د حامد کرزي د نړیوال هوايي ډګر وضعیت نور هم ګډوډ شوی دی.
په دې پېښه کې یو افغان ساتونکی وژل شوی دی.
له بلې خوا د طالبانو یوه ویندوی نن / دوشنبه وویل، دوی به له ټاکلې نېټې وروسته د کابل په نړیوال هوايي ډګر کې د عملیاتو د نېټې له غځولو سره موافقه ونه کړي.
د امریکا حکومت د اګست تر ۳۱ پورې له افغانستانه د بهرنیانو او یو شمېر افغانانو د ایستلو لپاره وروستۍ نېټه اعلان کړې وه.
خو د طالبانو یوه ویندوی سُهیل شاهین سکای نیوز ته وویل«که دوی د عملیاتو د چارو نېټه اوږدوي، معنا به یې دا وي چې د اشغال موده اوږدوي حال دا چې دې کار ته اړتیا نه شته.»
شاهین همداراز وویل«که امریکا او بریتانیا دا غوښتنه لري چې د خلکو د ایستلو لپاره وخت اوږد شي، زموږ ځواب دا دی چې نه.»
شاهین وايي، که دوی د اګست له ۳۱ وروسته هوايي ډګر پرې نه ښود، عواقب به ورته ولري.
له بلې خوا د بریتانیا صدراعظم بوریس جانسن هڅه کوي چې له افغانستانه د هوا له لارې د خلکو د ایستلو لپاره ټاکل شوې نېټه وغځول شي.
د پریس اسوشي اېشن د راپور له مخې، جانسن به د ۷ سترو صنعتي هیوادونو په سرمشریزه کې، چې سبا دایریږي، دا موضوع د امریکا له ولسمشر سره مطرحه کړي.