یوې افغان مېرمنې، چې د امریکا په پوځي الوتکه کې د کابل له هوايي ډګره ایستل شوې وه، جرمني ته له رسېدو سره سم، ماشوم وزېږاوه.
د امریکا پوځ نن / یکشنبه پر خپله ټویټرپاڼه کښلي، ښځې ته هغه مهال د هوا د ټیټ فشار له کبله تکلیف پیدا شو چې د الوتکې ارتفاع ډېره یعني تر ۸ زره ۵۳۴ متره لوړه وه.
خو کله چې الوتکه د جرمني په رامستین اډه کې کښېناسته، ماشوم دنیا ته راغی. ماشوم او مور یې نژدې روغتون ته یووړل شول او د دواړو روغتیايي وضعیت ښه دی.