تاند(سې شنبه، د اسد ۲۷) ټاکل شوې ده چې نن پخوانی ولسمشر حامد کرزی، د ملي مصالحې پخوانی ريیس عبدالله عبدالله او د اسلامي حزب مشر ګلبدین حکمتیار دوحې ته لاړ شي.

دوی، چې د یکشنبې په ورځ له هیواده د ولسمشر اشرف غني له وتلو وروسته په خپل سر د همږغۍ شورا اعلان کړه، غواړي چې د طالبانو له مشرانو سره وویني.

ښاغلیو کرزي، عبدالله او حکمتیار تمه لرله چې کابل ته د طالبانو د مشرانو تر رسېدو پورې به د دې ښار اداره په لاس کې لري خو د دوی له اعلانه لا یو ساعت نه و پوره شوی چې طالبانو د ارګ په شمول د ټول کابل ښار امنیت په خپل لاس کې واخیست.

الجزیرې او رویټرز خبري اژانس ویلي چې حامد کرزی، عبدالله او حکمتیار نن دوحې ته روانیږي.

په راپور کې په دقیق ډول نه دي ویل شوي چې دوی به له طالب مشرانو سره پر کومو موضوعاتو خبرې کوي.

راپورونه وايي چې طالب مشران د امریکا، پاکستان او قطر له لوري تر فشار لاندې دي چې ټولشموله حکومت ته لاره هواره کړي.

له همدې کبله تر دې دمه طالب مشران کابل ته نه دي راغلي او خپل حکومت یې نه دی اعلان کړی.