تاند(چهارشنبه، اسد6) – راپورونه وايي، وسله والو طالبانو په افغانستان کې د تاجکستان انصارالله ډلې ته د فعالیت زمينه برابره کړې ده.
عيني شاهدان وايي، کله چې وسله والو طالبانو تېره مياشت د بدخشان ځينې سيمې ونيولې نو دغې ډلې هلته ته د طالبانو بيرغ پورته کړ.
ويل کېږي د انصارالله ډله اوسهال د بدخشان پرپوله پر پنځو ولسواليو کنټرول لري.
څېړنيز راپور وايي، د افغانستان پر پوله د یوې سقوط شوې سیمې یوه اوسېدونکي رسنیو ته و8، د مهدي ارسلان په نوم په تاجکستان کې یوه زېږېدلي وګړي پر سرحدي پوسته د طالبانو بیرغ اوچت کړ.”
د راپور له مخې د تاجکستان دغه بنسټپال وسله وال د بدخشان ولایت په کوفاب، شِکی، نِسَی، مایمَی او خواهان کې حضور لري، چې مشري یې په خټه د تاجکستان یو ګړی مهدي ارسلان کوي.
د ارسلان اصلي نوم محمد شریفوف دی چې د تاجکستان په ختیځ کې د نور اباد سیمې اوسېدونکی دی.
په تاجکستان کې دننه د انصارالله ډلې پر فعالیت بندیز لګېدلى او غړي یې د ترهګرۍ په تور تر تعقیب لاندې دي.
د تاجکستان چارواکو ویلي، د دوى معلومات ښيي چې د محمد شریفوف په رهبرۍ وسله وال کسان له پولې افغانستان ته اوښتي دي.
دغو چارواکو ویلي، دوی د طالبانو په لیکو کې د تاجکستان د لږ تر لږه ۲۰۰ وګړو موجودیت تثبیت کړی دی.
دغو وسله والو ته په افغانستان کې د تاجکستان وسله وال ویل کېږي چې د تاجکستان په لهجه خبرې کوي، خو په اصل کې د انصار الله ډلې غړي دي.
تردې مخکې د بدخشان ولایت چارواکو ویلي چې په دې ولایت کې ځايي طالبان د انصار الله ډلې تر څنګ د شرقي ترکستان، د ازبیکستان اسلامي غورځنګ او د قفقاز اسلامي امارت له ډلو سره اړیکې لري.
وسله وال طالبان تر دې مخکې هم په بېلابېلو ولایتونو کې له نورو افراطي ډلو سره په ارتباط لرلو تورن شوي دي.
د افغانستان د بهرنیو چارو وزیر محمد حنیف اتمر د روان لمريز کال د چنګاښ پر لومړۍ نېټه د ملګرو ملتونو امنیت شورا ته په خبرو کې ویلي و، وسله والو طالبانو لا هم القاعده شبکې ته پناه ورکړې، دغه راز له لشکرطیبه، د پاکستاني طالبانو له غورځنګ، د ختیځ ترکستان اسلامي غورځنګ او د ازبیکستان له اسلامي غورځنګ سره اړیکې لري.
د وسله والو طالبانو یوه ویاند ذبیح الله مجاهد د القاعده په ګډون له نورو ترهګريزو ډلو سره د طالبانو د اړیکو موضوع رد کړه:
بل خوا د تاجکستان چارواکو اندېښنه څرګنده کړې، چې تاجکستان ته له افغانستانه د اوښتونکو کډوالو په ډله کې ښايي د افراطي وسله والو ډلو غړي هم داخل شي.
د ټاس خبري اژانس په حواله، د دې هېواد د بهرنیو چارو وزیر سراج الدین مهرالدین د سې شنبې په ورځ ویلي، د دغې ستونزې د مخنیوي لپاره ځانګړو اقداماتو ته اړتیا ده.