تاند (چهارشنبه د سرطان ۳۰) ولسمشر اشرف غني یو ځل بیا ویلي چې د طالبانو جګړه هیڅ راز دیني او ملي مشروعیت نه لري.
د ارګ له لوري په خپره شوې خبرپاڼه کې راغلي چې ښاغلي غني دا څرګندونې نن مخکې له غرمې د ځانګړو عملیاتو قول اردو څخه د لیدنې پر مهال وکړې.
نوموړي وویل چې د دوی ټول تمرکز د وضعیت پر مدیریت دی او د ځانګړو پلانونو پر بنسټ به له درېیوو تر شپږو میاشتو پورې په وضعیت کې د پام وړ مثبت بدلون راشي.
خبرپاڼه زیاتوي، «جمهوررئیس وویل، د طالبانو جګړه دیني او ملي مشروعیت نه لري او له دریو تر شپږو میاشتو زموږ ټول تمرکز د اوسني وضعیت په مدیریت دی او د ځانګړو پلانونو او برنامو پر اساس به لا زیات مثبت بدلون ومومي.»
د خبرپاڼې له مخې نوموړي کومانډو ځواکونو ته په خطاب کې وویل چې د دښمن نیت صاف نه دی، تاسې باید ځان ثابت کړئ څو دښمن خپل ارمان ګور ته یوسي.
ارګ وايي، ولسمشر غني همدارنګه ملي امنیتي ځواکونو ته د هر راز ملاتړ ډاډ ورکړ او زیاته یې کړه چې تېرې لاسته راوړنې به نه ضایع کېږي او ټول به په ګډه د افغانستان د ښې راتلونکې لپاره کار ته دوام ورکوي.