تاند (شنبه د سرطان ۱۹) د سیمې په کچه د پښتو ژبې مشهور نثر لیکونکي نصیراحمد احمدي د ۴۷ کالو په عمر د ورپېښې ناروغۍ له امله نن ماښام د کابل په یو روغتون کې ساه ورکړه.
احمدي ته نیږدې کسانو ویلي چې هغه له تېرو لسو ورځو راهیسې پر کورونا ناروغۍ اخته او په روغتون کې بستر و.
نوموړی د غزني ولایت د قره باغ ولسوالي اوسیدونکی و چې له شلو ډیر د ناولونو، لنډو کیسو او د مشهورو لیکوالانو د ژوند لیکونو کتابونه یې لیکلي وو، د هغه په چاپ شوو اثارو کې تر ټولو مشهور د “نیکه” او “بغدادي پیر” په نومونو دوه تاریخي ناولونه دي.
نصیراحمد احمدي له ٢٠٠٣ کال را په دېخوا د بي بي سي راډيو په ښوونیزه پروژه کې دنده تر سره کوله، په پيل کې يې په نوموړې ادارې کې د رپورټر او له تېرو شپږو کلونو راپه ديخوا د ماشومانو او لويانو له پاره د فيچر خپرونو ايډيټر و.
د نوموړي له مړینې سره سم په کور دننه او بهر ګڼ شمېر لیکوالانو او د هغه د چاپ شوو اثارو مینه والو پر ټولنیزو رسنیو د خواشینۍ پیغامونه خپاره کړي او د احمدي مړینه یې د پښتو ادب لپاره لویه ضایع بللې ده.