تاند(جمعه، د سرطان ۱۱) وسله والو طالبانو په کندوز ولایت کې له وروستیو پرمختګونو سره سره په دې ولایت کې یو لوی او دوه نسبتاً کوچني پلونه ویجاړ کړي دي.
د کندوز چارواکي وايي، طالبانو په امام صاحب ولسوالي کې یو لوی او ده واړه پُلونه د ماینونو او چاودېدونکو موادو په ذریعه ویجاړ کړي دي.
د سیمې اوسېدونکي وايي، د دغو پُلونو د ویجاړېدو له کبله دوی ته په تګ راتګ کې ډېرې ستونزې پیدا شوې دي.
د چارواکو په وینا د دغو پلونو بیا جوړېدا ملیونونو ډالرو ته اړتیا لري.
پرون وسله والو طالبانو په پکتیکا کې هم دوه پلونه ویجاړ کړل.
د پکتیکا ولايت د امنیه قومانداني وياند شاه محمد ارين وایي دا پل وړمه شپه د وسله والو طالبانو له لوري په بمونو الوزول شوی دی.
د نوموړي په وینا، وسله والو طالبانو په پکتیکا کې د ښرنې – ارګون پر لویه لار د «پړاو» په نوم لوی پل په بمونو الوزولی دی.
ارین زیاتوي چې د ياد پل ويجاړېدو له امله د بار وړونکو موټرو تګ راتګ بند شوی دی.
وسله والو طالبانو تر اوسه په دې اړه څه نه دي ويلي.