تاند ( یکشنبه، د سرطان ۶ مه) د ولسمشر محمد اشرف غني لومړی مرستیال امرالله صالح وایي، امریکا له افغانستان سره په خپلو ژمنو ولاړه او د دواړو هېوادونو د اړیکو نوی فصل رامنځته شوی دی.
هغه نن یکشنبه/ د سرطان / ۶ / ۱۴۰۰ پر خپله فېسبوک پاڼه لیکلي چې امریکا ته د حکومتي پلاوي وروستی سفر له لاس ته راوړنو ډک و.
نوموړي زیاته کړې چې امریکا پر خپلو ژمنو ولاړه ده او بایډن ټینګار کړی چې دی د افغانانو د ملګري په توګه په سپينه ماڼۍ کې شته دی.
امرالله صالح وایي چې د افغانستان د دوستانو له ډلې سره یې د دروازو تر شا اوږدې خبرې لرلې دي او دوی ټینګار کړی دی چې د امریکايي حکومت په بېلو برخو کې به د افغانستان لپاره د مرستو او ملاتړ د جذب په برخه کې کار کوي.
صالح وايي چې دوی خپل سفر په موخو کې بریالي وو او په وینا یې د اړیکو په نوي فصل کې د امریکا او افغانستان ترمنځ لا ډېرې همکارۍ ته هیلې شته دي.
تر دې وړاندې ولسمشر غني هم په خپلو خبرو کې ویلي وو چې سفر یې بریالی و او په خپلو موخو کې بریالي وو.
دا په داسې حال کې ده چې وړمه ورځ راپورونه ورکړل شول چې امریکایي بې پیلوټه الوتکو په افغانستان پر طالبانو بریدونه کړې دي.
د راپورونو له مخې د امریکايي پوځیانو له خوا دغه بریدونه د ولسمشر غني او ولسمشر بایډن تر لیدنې څو ساعته مخکې وشول، خو طالبانو ته د دغو بریدونو له امله د اوښتې مرګ ژوبلې په هکله پوره جزیات نه دي ورکړل شوي.
له دې سره هممهال د افغانستان په شمالي ولایتونو کې د افغان سرتېرو او طالبانو تر منځ جګړې زیاتې شوي چې او ګڼ شمېر ولسي خلکو د افغان ځواکونو په ملاتړ او طالبانو پر ضد وسلې پورته کړي دي.
د امریکا پوځ تر دې وړاندې هم ویلي چې د اړتیا په صورت کې به د افغان سرتېرو هوایي ملاتړ او پر طالبانو بریدونه کوي.