تاند(پنجشنبه، د جوزا ۲۰) ترکیه د کابل د نړیوال هوايي ډګر د امنیت ساتلو په بدل کې د ناټو له غړیو هیوادونو څخه پیسې غواړي.
د بلومبرګ د راپور له مخې، د ترکیې د بهرنیو چارو وزیر مولود چاوش اوغلو تېره شپه (چهارشنبه) د خپل هیواد دولتي (ټي آر ټي) تلویزیون ته وویل «په افغانستان کې پاتې کېدل داسې مسوولیت نه دی چې یو هیواد یې د نورو له ملاتړه پرته په غاړه واخیستلی شي. امنیتي خطرونه شته، او ورسره ډېر مالي لګښت. باید چې لګښتونه شریک شي.»
امریکا او ناټو له وړاندې څخه له افغانستانه د خپلو پاتې پوځیانو پر ایستلو پیل کړی دی. د امریکا د مرکزي قوماندانۍ یا سنټکام پر اساس، د مې د میاشتې له پیله تراوسه پورې امریکا په افغانستان کې د خپلو ۲۵۰۰ سرتېرو په سلو کې ۵۰ ایستلي دي. د ناټو نورو غړیو هم خپل اکثره ځواکونه ایستلي خو په دې منځ کې د ترکیې پوځیان لا هم په افغانستان کې دېره دي.
ترکیه پر دې سربېره چې یو اسلامي هیواد دی، له پاکستان سره ډېرې نژدې او ستراتیژیکې اړیکې لري.
د امریکا او نړیوالو لپاره د کابل د هوايي ډګر امنیت په دې خاطر هم مهم دی چې په دې ښار کې ګڼ شمېر دیپلوماتان او سفارتونه لري.
په پام کې ده چې د راتلونکې دوشنبې په ورځ په بروکسل کې د ناټو د سرمشریزې ترڅنګ د امریکا د ولسمشر جو بایډن او د ترکیې د ولسمشر رجب طیب اردوغان په کتنه کې د کابل د حامد کرزي هوايي ډګر د امنیت ساتلو موضوع د دواړو خواوو د خبرو د اجنډا په سر کې وي.
پرون (چهارشنبه) د پنتاګون ویندوی جان کربي وویل«په دې اړه خبرې روانې دي چې د کابل د هوايي ډګر د امنیت مسوولیت د چا په غاړه وي او په څه حد کې د دغه هوايي ډګر د امنیت لپاره ځواکونه وګومارل شي.»
ترکیه له افغانستان سره تاریخي اړیکې لري. د دغه هیواد بنسټګر مصطفي کمال اتاترک په ۱۹۲۸ م کال، کله چې د افغانستان د هماغه وخت د پاچا امان الله خان حکومت د سقوي بلوا په نتیجه کې له پرزېدو سره مخامخ شو، د افغانستان ته یې د کومکي ځواک د لېږلو وړاندیز وکړ خو د افغانستان پاچا ونه مانه.
د امان الله خان پر ضد د بلوا په عواملو کې یو هم ترکیې ته د زده کړو لپاره د نجونو استول و.