تاند (پنجشنبه د جوزا ۲۰) تېره شپه د بغلان مرکز پلخمري په اړوند سیمه کې د ملي اردو پوستې ته نیږدې موټر بم چاودنه شوي ده.
د هېواد په شمال ختیځ زون کې د ۲۱۷ پامیر قول اردو چارواکو ویلي چې طالبانو غوښتل د پلخمري ښار اړوند په باغ شمال سیمه کې د ملي اردو پر پوسته موټربم ډله ایز برید وکړي چې هدف ته له رسیدو وړاندې یې له منځه وړی دی.
د سرچینې د مالوماتو له مخي، په یاده چاودنه کې د طالبانو درې ځانمرګي بریدګر او درې د ملي اردو سرتیري وژل شوي دي.
په ورته مهال بیا په یاد ولایت کې امنیتي سرچینو ویلي چې طالبانو له دې برید سره همهاله د بغلان-سمنګان لویه لاره کې ماینونه ځای پر ځای کړي او دغه لویه لار یې د تګ راتګ پرمخ تړلې ده.
طالبانو تر اوسه په دې اړه څه نه دي ویلي.