تاند — د افغانستان د بشري حقونو کمېسیون وايي، تیره مۍ میاشت په دغه هیواد کې د تاوتریخوالي او جګړو له امله ۲۸۰ ملکيان وژل شوي او ۶۳۴ نور ټپیان شوي دي.
د دغه کمېسیون د نشراتو رييس ذبیح الله فرهنګ نن چهارشنبه/ د جوزا ۱۲مه/ رسنیو ته په استول شوي پیغام کې ویلي چې په وژل شویو کسانو کې لسګونه ماشومان هم شامل دي.
فرهنګ زیاته کړې: “په وژل شوېو کې یوسلو نهه ماشومان دي، خو زموږ باور دا دی چې د وژل شوېو ماشومانو شمېر به تردې ډېر وي. ۶۳۴ نور ملکیان ژوبل شوي دي. نو د دایمي اوربند اعلان به د افغانانو د زړه غوښتنه وي.”
نوموړي دا نه ده په ډاګه کړې چې ډېر ملکیان د افغانستان په کومه سیمه وژل شوي دي، خو ټینګار یې کړی چې د افغانستان حکومت او طالبان باید د سولې مذاکرات په خپل لومړیتوب کې ولري او په وینا یې د تلپاتې اوربند ټینګېدل د افغانستان د خلکو د اساسي غوښتونو څخه ده.
د بشري حقونو کمېسیون اندېښنه ښودلې چې په افغانستان کې د جګړې او تاوتریخوالي اصلي قربانیان ملکیان دي، نو په کار ده چې ملګري ملتونه او نړیواله ټولنه د جګړې ختمېدو او د افغانانو د بشري حقوقو د ملاتړ په برخه کې خپل حقوقي او اخلاقي مسؤلیت ادا کړي.
د روان تاوتریخوالي په تازه پېښه کې تیره ورځ په کابل ښار کې په دوو کاسټر موټرو کې د چاودنو له امله ۱۰ ملکيان ووژل شول او ۱۲ نور ټپيان شول.
ورته مهال په افغانستان کې د ملګرو ملتونو سیاسي استازوالۍ یا یوناما هم په افغانستان کې د تاوتریخوالي زیاتېدو په اړه اندېښنه ښودلې او د ژر تر ژره تاوتریخوالي کمېدو، د سولې خبرو کې په پرمختګ او د ملکي وګړو پر خوندیتوب باندې ټینګار کړی دی.
یوناما د جګړې له ښکیلو خواوو غوښتي چې د ملکي وګړو خوندیتوب ته پاملرنه وکړي.